MA (Tshivenda) / Senthara ya M.E. R. Mathivha ya Nyambo dza Afrika, Vhutsila na Mvelele / Muvhuso wa vhukoḽoni u tshi swika kha ḽino ḽa Afrika Tshipembe hu vhonala hu tshi nga wo vha wo ḓisa nḓaḓo na masiandaitwa mivhusoni ya vhongwaniwapo vha vharema, vhe vha vhonala vha tshi nga vho vha vho dzula zwavhuḓi ḽo lala. U bva zwenezwo hu vhonala hu tshi nga yo sia nḓaḓo na masiandaitwa azwo. Zwi vhonala zwi tshi vho nga tshilonda tshi sa phuphei tshine tsha dzulela u ṅweka tshi sa fholi u swika na ṋamusi. Ndivho ya iyi ṱhoḓisiso ndi u ita tsenguluso ya tsudzuluswo ya vhuluvha ha vhalanda u bva kha vhurangaphanḓa ha sialala u ya kha vhorapoḽotiki vha muvhuso tshiṱirikini tsha Vhembe. Muṱoḓisisi u ḓo shumisa ngona nthihi fhedzi, ndi ngona ya khwaḽithethivi. Kha ngona ya khwaḽithethivi muṱoḓisisi u ḓo kuvhanganya mafhungo awe nga u shumisa mbudzisavhathu na mbudziso. Vhurangaphanḓa ha sialala vhu vhonala vhu tshi nga vhu ḓo vhuelwa nga u luvhiwa, u ṱhonifhiwa, u wana mashango avho murahu khathihi na u ḓo swikelela kha u vha tshipiḓa tsha komiti ya vhusimamilayo ya muvhuso wa masipala, tshiṱirikini tsha Vhembe, vunduni ḽa Ḽimpopo. Ṱhoḓisiso iyi yo livha kha u tandulula thaidzo ya u sudzuluswa ha vhuluvha ha vhadzulapo u bva kha vhurangaphanḓa ha sialala u ya kha vhorapoḽotiki vha muvhuso. Ṱhoḓisisoni iyi hu vhonala zwi tshi nga hu ḓo konanywa vhurangaphanḓa ha sialala na vhorapoḽotiki, u tandulula thaidzo ya u sudzuluswa ha vhuluvha, u sa vha hone ha tshumisano vhukati ha vhurangaphanḓa ha sialala na vhorapoḽotiki vha muvhuso, u sa vha hone ha komiti ya ṱhanganelano masipalani, vhurangaphanḓa ha sialala na vhorapoḽotiki vha vhonala vha tshi ḓo ḓivha nḓila dzine vha nga dzi tevhela u vhuedzedza mashango kha vhaṋe vhao. Ṱhanganelano ya vhuvhusi ha shango na komiti ya mahosi, zwi vhonala i tshi nga vha yone nḓila ine ya nga fhelisa mifhirifhiri na pfhudzungule tshiṱirikini tsha Vhembe, vunduni ḽa Ḽimpopo, Afrika Tshipembe. / NRF