Kundige bestuur is n hedendaagse begrip wat beskou word as die rede waarom sommige organisasies net funksioneer en ander uitstekend presteer. Die eise wat aan bestuurders van besighede en Nie–Winsgewende Organisasies (NWOs) se bestuursmilieu gestel word, is uiters hoog en vereis vaardigheid, kennis en ondervinding. Die bestuur van NWOs behoort goed ingelig te wees ten opsigte van die bestuursvaardighede waaroor hul eweknieë in die sakesektor beskik. Opleiding in maatskaplike werk in Suid–Afrika is goed ontwikkel en het in die afgelope 20 jaar in verskeie spesialisvelde binne die vakgebied ontvou. Maatskaplikewerk–dienslewering fasiliteer die groei en ontwikkeling van maatskaplike werkers, wat daartoe aanleiding gee dat hulle in so n mate vorder dat hulle hul kort voor lank in bestuursposisies bevind. n Wyer kennisbasis rakende bestuursdinamiek word vereis om die oorgang van maatskaplike werker na bestuurder te kan maak en sodoende doeltreffend as bestuurder te kan funksioneer. Bestuursopleiding deur maatskaplikewerk–opleidingsinstansies in Suid–Afrika bied nie tans spesifieke bestuursopleiding in die NWO–konteks aan nie. Ondersoek is deur hierdie studie ingestel om n model te ontwikkel om bogenoemde aan te spreek.
Hoofstuk 1 fokus op die formulering van die navorsingsonderwerp en gee die sentrale strategiese agument en doel met doelwitte. Hoofstuk 2 beskryf die navorsingsmetodologie wat gebruik is in die studie.
Hoofstuk 3 vervat n literatuurstudie wat handel oor die huidige funksionering van NWOs in Suid–Afrika. Daar word gefokus op die bestuursprosesse en rolspelers binne n NWO, die sosiale, politieke en ekonomiese faktore wat die funksionering van NWOs beïnvloed, bestuursmodelle en –teorieë, leierskap en die oorgang van maatskaplike werker na NWO–maatskaplikewerkbestuurder. Hierdie inligting bied die agtergrond waarteen die funksionering van NWO–bestuurders in Mpumalanga, Gauteng, Vrystaat en Noord–Kaap gekontekstualiseer kan word.
In Hoofstuk 4 word die data wat vanuit die situasie analise met die NWO–bestuurders in Mpumalanga terugontvang is, verwerk en gerapporteer. n Profiel word verskaf ten opsigte van die NWOs in Mpumalanga asook die bestuursrolspelers en –prosesse wat geïmplementeer is. Daarna word die profiel van NWO–bestuurders in Mpumalanga voorgehou met spesifieke fokus op bestuurskennis en –vaardighede van NWO–bestuurders in Mpumalanga. Die opleidingsbehoeftes van NWO–bestuurders word opgesom en geprioritiseer. Die beskikbaarheid van bestuursopleidingsprogrammes in Suid–Afrikaanse maatskaplikewerk–opleidingsinstansies word daarna weergegee.
Hoofstuk 5 gee n oorsig van die heersende situasie in Suid–Afrikaanse NWOs vanuit data wat verkry is uit fokusgroepbesprekings met maatskaplike werkers wat as NWO–bestuurders in Gauteng, Vrystaat en die Noord–Kaap werk. Klem word gelê op die fokusgroeplede se persoonlike ervarings van hul oorgang van maatskaplike werker na NWO–bestuurder binne die huidige funksionering van NWOs. Die spesifieke bestuursprosesse en rolspelers in NWOs betrokke by die fasilitering van die oorgang, soos deur NWO–bestuurders geïdentifiseer, word uitgelig.
In hoofstuk 6 word n model vir die fasilitering van die oorgangsproses vir bestuurders voorgestel en met die geïdentifiseerde opleidingsbehoeftes geïntegreer.
Hoofstuk 7 bestaan uit die gevolgtrekkings en samevattings wat gemaak is uit die studie. Ten slotte word aanbevelings rakende die fasilitering van die oorgangsproses van maatskaplike werkers na bestuurders van NWOs gemaak. / Thesis (Ph.D. (Social Work))--North-West University, Potchefstroom Campus, 2012.
Identifer | oai:union.ndltd.org:NWUBOLOKA1/oai:dspace.nwu.ac.za:10394/7038 |
Date | January 2011 |
Creators | Nel, Benita Salomina |
Publisher | North-West University |
Source Sets | North-West University |
Detected Language | Unknown |
Type | Thesis |
Page generated in 0.0011 seconds