PhD (Xitsonga) / Xikolo xa Tisayense laswa Vanhu na Mahanyelo / Ndzavisiso lowu wu thyiwile Nxopaxopo wa Nkoka wa Tinsimu ta Thomas Hasani Chauke eka ku Tlakusa na ku Hluvukisa Xitsonga na Ndhavuko wa Vatsonga (An Analysis of the Role of Thomas Hasani Chauke’s Songs in the Development and Promotion of Xitsonga and Vatsonga Culture). Xikongomelonkulu xa ndzavisiso lowu i ku xopaxopa vuyimbeleri bya Thomas Hasani Chauke byi wu tirheke hakona ku ku tlakusa na ku hluvukisa Xitsonga na ndhavuko wa Vatsonga hakona. Hi lembe ra 1996 Vumbiwa bya tiko lebyi byi hlohlotelaka leswaku tindzimi hinkwato ta khumen’we ta ximfumo ti fanele ku khomiwa ku ringana byi pasisiwile. Kambe loko hi xiya hi kuma leswaku tindzimi ta Vantima ta ha ri eka xiyimo xa le hansi swinene. Huvo ya Pan South African Language Board (PanSALB) leyi simekiweke ku ringeta ku tlakusa na ku vona leswaku tindzimi hinkwato ta ximfumo ta hluvuka yi kuma swisolo eka vanhu lava pumbaka leswaku ntirho wa vona wu famba hi rivilo ra rimpfana. Leswi swi endle leswaku van’watindzimi va sungula njhekanjhekisano wo lava tindlela to vona leswaku tindzimi ta Vantima ta hluvukisiwa. Eka Xitsonga, muyimbeleri wo fana na Thomas Hasani Chauke u le ku tlangeni ka xiave xikulu eka ku hluvukisa na ku tirhisa Xitsonga na ku tlakusa ndhavuko wa Vatsonga hi vuyimbeleri byakwe. Ndzavisiso ku ya hi nkoka hi wona wu nga ta tirhisiwa eka xitsalwana lexi. Tinsimu to hambanahambana leti eka nandzelelo wa yena wa Shimatsatsa leti kandziyisiweke ku suka hi 1980 ku fika hi 2014 ti ta xopaxopiwa hi ku tirhisa thiyori yo xopaxopa. Ndzavisiso lowu wu kumile leswaku Thomas Hasani Chauke u tlanga xiave xikulu swinene eka ku tlakusa na ku hluvukisa Xitsonga na ndhavuko wa Vatsonga. Matirhiselo ya yena ya ririmi na mikongomelo leyi a yimbelelaka hi yona hi swona swi nga ta kombisa mhaka leyi.